Üçtərəfli bəyanat

10 noyabr 2020, 04:45

Biz, Azərbaycan Respublikasının Prezidenti İ.H.Əliyev, Ermənistan Respublikasının Baş naziri N.V.Paşinyan və Rusiya Federasiyasının Prezidenti V.V.Putin, aşağıdakıları bəyan edirik:

1. 10 noyabr 2020-ci il Moskva vaxtı ilə saat 00:00-da Dağlıq Qarabağ münaqişəsi zonasında tam atəşkəs və bütün hərbi əməliyyatların dayandırılması tətbiq edilsin. Azərbaycan Respublikası və bundan sonra Tərəflər adlandırılacaq Ermənistan Respublikası hazırkı mövqelərində dayanacaqlar.

2. Ağdam rayonu 20 noyabr 2020-ci il tarixinədək Azərbaycan Respublikasına qaytarılsın.

3. Dağlıq Qarabağdakı təmas xətti boyunca və Laçın dəhlizi boyunca Rusiya Federasiyasının 1960 nəfərlik atıcı silahı olan hərbi qulluqçusu, 90 zirehli transportyoru, 380 ədəd avtomobil və xüsusi texnikası olan sülhməramlı kontingenti yerləşdirilsin.

4. Rusiya Federasiyasının sülhməramlı kontingenti Ermənistan silahlı qüvvələrinin çıxarılması ilə paralel olaraq yerləşdirilsin. Rusiya Federasiyasının sülhməramlı kontingentinin qalma müddəti 5 ildir və Tərəflərdən heç biri bu müddəanın tətbiqinə xitam vermək niyyəti müddətinin bitməsinə altı ay qalmış bəyan etmədikdə, avtomatik olaraq növbəti beş illik müddətə uzadılır.

5. Münaqişə Tərəfləri tərəfindən sazişlərin icrasına nəzarətin səmərəliliyini artırmaq məqsədilə atəşkəs rejiminə nəzarəti həyata keçirmək üçün sülhməramlı mərkəz yerləşdirilir.

6.Ermənistan Respublikası Kəlbəcər rayonunu 15 noyabr 2020-ci il tarixədək, Laçın rayonunu isə 1 dekabr 2020-ci il tarixədək Azərbaycan Respublikasına qaytarmalıdır. Dağlıq Qarabağın Ermənistanla əlaqəsini təmin edən və Şuşa şəhərinə təsir göstərməyən Laçın dəhlizi (eni 5 km) Rusiya Federasiyasının sülhməramlı qüvvələrinin nəzarətində qalacaqdır.

Tərəflərin razılığı ilə Laçın dəhlizi boyunca növbəti üç il ərzində Dağlıq Qarabağ və Ermənistan arasında rabitəni təmin edən, sonradan bu marşrutun qorunması üçün Rusiya sülhməramlı kontingentinin yenidən yeridilməsi ilə yeni marşrutun tikintisi planı müəyyən ediləcək.

Azərbaycan Respublikası Laçın dəhlizi ilə hər iki istiqamətdə hərəkət edən vətəndaşların, nəqliyyat vasitələrinin və yüklərin təhlükəsizliyinə təminat verir.

7. Məcburi köçkünlər və qaçqınlar Birləşmiş Millətlər Təşkilatının Qaçqınlar üzrə Ali Komissarlığının nəzarəti altında Dağlıq Qarabağ ərazisinə və ona bitişik rayonlara qayıtmalıdırlar.

8. Hərbi əsirlərin və digər həbs edilmiş şəxslərin və ölənlərin cəsədlərinin dəyişdirilməsi həyata keçirilir.

9. Regionda bütün iqtisadi və nəqliyyat əlaqələri bərpa edilsin. Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətini təşkil etmək məqsədilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqələrinin təhlükəsizliyinə təminat verir. Nəqliyyata nəzarət Rusiya Federal Təhlükəsizlik Xidmətinin (FSB) Sərhəd Mühafizə Xidmətinin orqanları tərəfindən həyata keçirilir.

Tərəflərin razılığı ilə Naxçıvan Muxtar Respublikasını Azərbaycanın qərb rayonları ilə birləşdirən yeni nəqliyyat kommunikasiyalarının tikintisi təmin ediləcək.

10 noyabr 2020-ci il

Azərbaycan Respublikasının Prezidenti

Ermənistan Respublikasının baş naziri

Rusiya Federasiyasının Prezidenti